सोलापूर (प्रतिनिधी)
सोलापूर शहर पोलिसांच्या गुन्हे शाखेने अत्यंत कौशल्यपूर्ण आणि वेगवान कारवाई करत जबरी चोरी करणाऱ्या दोन आंतरजिल्हा गुन्हेगारांना अटक केली असून, त्यांच्याकडून १ लाख ८० हजार रुपयांचा मुद्देमाल हस्तगत करण्यात आला आहे. ही कारवाई सोलापूर पोलिस दलाच्या चोख गुप्त माहिती व्यवस्थापन आणि तांत्रिक क्षमतेचे उत्कृष्ट उदाहरण ठरली आहे.
घटनेचा तपशील:
दि. १५ एप्रिल २०२५ रोजी सायंकाळी ७:४५ वा. दरम्यान, सौ. रेखा सिध्देश्वर बिजली (वय ३३, गृहिणी, रा. मंत्रीचंडक नगर, भवानी पेठ, सोलापूर) या देवदर्शनावरून परतत असताना दीप हॉस्पिटलजवळ दोन अनोळखी युवकांनी त्यांच्या गळ्यातील १५ ग्रॅमचे सोन्याचे मंगळसूत्र जबरदस्तीने हिसकावून मोटारसायकलवरून पळ काढला. या घटनेने परिसरात भीतीचं वातावरण निर्माण झालं होतं.
या प्रकरणी जोडभावी पेठ पोलीस ठाण्यात भारतीय दंड विधान संहिता २०२३ नुसार कलम ३०९(४), ३(५) अंतर्गत गुन्हा नोंदवण्यात आला होता.
शोधमोहीम आणि अटक:
गुन्हे शाखेचे व.पो.नि. श्री. सुनिल दोरगे व सपोनि शैलेश खेडकर यांच्या मार्गदर्शनाखाली एक विशेष पथक तयार करण्यात आले. पथकाने घटनेच्या ठिकाणावरील आणि परिसरातील सीसीटीव्ही फुटेज बारकाईने तपासून, आरोपींचा मागोवा घेतला. त्यानंतर मिळालेल्या गुप्त माहितीच्या आधारे, दि. २ मे २०२५ रोजी रुपाभवानी मंदिर रस्त्यावर सापळा रचून, संशयित आरोपी हणमंत रामचंद्र बोडके (वय २२, रा. पाथरुड, धाराशिव) व नागेश उर्फ नागनाथ दयाप्पा पाटोळे (वय २३, रा. सांगली, सध्या धाराशिव) यांना अटक करण्यात आली.
जप्त मुद्देमाल:
Yamaha FZ काळी मोटारसायकल — ₹१,००,०००/-
१५ ग्रॅम वजनाचे सोन्याचे मंगळसूत्र — ₹७०,०००/-
Vivo कंपनीचा मोबाईल — ₹१०,०००/-
एकूण जप्ती — ₹१,८०,०००/-
पोलीस दलाची कामगिरी उल्लेखनीय:
या यशस्वी कारवाईत पोलीस आयुक्त मा. श्री. एम. राजकुमार, उपायुक्त डॉ. दीपाली काळे, सहाय्यक पोलीस आयुक्त श्री. राजन माने, वरिष्ठ पोलीस निरीक्षक श्री. सुनिल दोरगे यांच्या मार्गदर्शनाखाली सपोनि शैलेश खेडकर व त्यांच्या तपास पथकातील पोलीस अंमलदार — संदीप जावळे, विनोद रजपूत, इम्रान जमादार, उमेश पवार, सिद्धाराम देशमुख, अजय गुंड, सतीश काटे, बाळासाहेब काळे यांनी महत्त्वाची भूमिका बजावली. यासोबतच सायबर पोलीस स्टेशनचे अधिकारी प्रकाश गायकवाड व मच्छिंद्र राठोड यांनीही तांत्रिक मदत पुरवली.
ही कारवाई सोलापूर गुन्हे शाखेच्या जलद प्रतिसाद क्षमतेचा आणि नागरीकांच्या सुरक्षेप्रती असलेल्या कटिबद्धतेचा पुरावाच आहे. पोलिसांच्या या धाडसाने शहरात चोरी व जबरी चोरीच्या घटनांवरील अंकुशासाठी एक सकारात्मक संदेश दिला आहे.
